Kryeministri i Kosovës, Albin Kurti, në rastin e Ditës së Tokës ka thënë veprimet e Qeverisë urgjente do të jenë ndalimi i praktikave të dëmshme dhe të paligjshme, njofton Insajderi.
Ai u shpreh se kjo ditë Kosovën e gjen në një gjendje më të rënduar në krahasim me vitin e kaluar, por theksoi se politikisht është më stabile për t’u përballur me krizat.
Këtë kreu i Qeverisë e tha në një postim në Facebook, ku shkroi se mbrojtja e bjeshkëve që janë shkatërruar nga prerjet ilegale, ndalimi i degradimit të lumenjve dhe restaurimi i tyre, vendosja e kontrollit mbi gurëthyesit dhe ndalimi i betonizimit të tokës bujqësore janë në listën e prioriteteve të Qeverisë.
“Pandemia ka shfaqur para nesh brishtësinë e botës tonë. Ka problematizuar veprimet tona ekonomike e shoqërore. Ka sjellë në vëmendjen tonë se përkundër dallimeve e interesave nuk kemi alternativë tjetër përpos të bëhemi bashkë, të mbrojmë e ndihmojmë njëri-tjetrin e ta trajtojmë seriozisht krizën mjedisore” ka shkruar Kurti.
“Ta ripërtrijmë Tokën, ta ruajmë shtëpinë tonë!”, ka përfunduar Kurti. /Insajderi.com
