Kryeministri i Kosovës, Albin Kurti, është deklaruar para mediave pak para darkës së punës në Bruksel, të thirrur nga Përfaqësuesi i Lartë i Bashkimit Evropian për Çështje të Jashtme dhe Siguri, Josep Borrell, ndaj liderëve të shteteve të Ballkanit Perëndimor, transmeton Insajderi.
Kurti në këtë adresim për media tha se në këtë takim do të diskutojë për liberalizimin e vizave për çka thotë se është e dëmshme që të rinjtë kosovarë të përballen me regjimin e vizave.
“Republika e Kosovës, është shtet me rini shumë të talentuar. Ata e shohin Bashkimin Evropian si mundësinë për të studiuar e punuar këtu dhe për t’u kthyer e për të kontribuar në vendin e tyre. Në këtë aspekt kemi nevojë për liberalizim të vizave. Jemi i vetmi vend në Evropë që kemi regjim të vizave që për të rinjtë tanë është një pengesë e madhe për të studiuar e për të bërë biznes. Shumica e popullsisë në Kosovë është rreth 30 vjeç dhe me rini aq të talentuar është dëm që të kemi këtë murin e izolimit”, u shpreh Kurti, raporton RTK.
Ai u shpreh se do të krijojë kontakte me kolegët në Bruksel për të diskutuar për reformat në Kosovë, por edhe për njohjet e reja.
“Si në çdo takim, konfirmojmë interesimin dhe gatishmërinë që të avancojmë në Bashkimin Evropian, e në të njëjtën kohë, ne diskutojmë këtu në Bruksel me shokët e kolegët se si të na ndihmojnë të bëjmë reforma në shtëpitë tona dhe anën tjetër, të kemi njohjen e pesë shteteve të cilat nuk na njohin”, theksoi Kurti.
“Ne besojmë që BE-ja është projekti më i rëndësishëm i paqes dhe progresit që nga Lufta e Dytë Botërore. Dhe, në shekullin e 21 ne duhet të mbrojmë Bashkimin Evropian dhe në të njëjtën kohë ne duhet të zhvillojmë lidhjet e brendshme mes shteteve dhe njerëzve, në mënyrë që të ndajmë më shumë vlera evropiane në njërën anë dhe mirëqenie e prosperitet për të gjithë njerëzit”.
“Në veçanti jemi të fokusuar të bëjmë më evropiane lidhjet mes shteteve të Ballkanit Perëndimor. Të bëjmë proces transparente te reformave dhe bashkëpunimit dhe në të njëjtën kohë të kemi më shumë investime në mënyrë që të punësojmë rininë, që në përgjithësi janë të papunë”, u shpreh Kurti.
“Do të shikoj që gjatë kësaj darke pune që të krijojë kontakte me liderët e tjerë dhe ndoshta për të udhëtuar më shpejt bashkë drejt BE-së, por edhe të afrohen më shumë njohjes së Republikës së Kosovës, që është në të mirë jo vetëm të vendit tonë por edhe paqen, sigurinë dhe stabilitetin afatgjatë në Evropë”, deklaroi tutje ai. /Insajderi.com
