Me të arritur dozat e para të vaksinës anti-COVID në Kosovë, sot pas orës 20:00, në fazën e parë të vaksinimit pritet të hyjnë tre për qind e popullatës, për të vazhduar fazën e dytë për 17 për qind dhe atë të tretën për 50 për qind, transmeton Insajderi.
Ministria e Shëndetësisë ka paraparë vaksinimin e qytetarëve të Kosovës kundër COVID-19 në tri faza.
Vaksina e parë që pritet të arrijë sonte pas orës 20:00 në Kosovë është ajo e “AstraZenecas” nga skema COVAX.
Ministria e Shëndetësisë ka aprovuar në shkurt Planin e ri shtetëror për vaksinim kundër COVID-19 në Kosovë.
“Sipas planit të pasqyruar në këtë dokument (Plani Shtetëror i Vaksinimit), futja në përdorim e vaksinës kundër COVID-19 do të bëhet gjate tri fazave. Në fazën e parë të futjes në përdorim të vaksinës, 3 % e popullsisë (apo 54,000 punëtorë shëndetësorë dhe të moshuar) do të vaksinohen. Në fazën e dytë – pjesa tjetër e popullsisë prej 17 % (306,000 qytetarë) do të vaksinohen”, shkruhet në plan.
Tutje aty thuhet se vëmendje e veçantë do t’i kushtohet barazisë në shpërndarje të tyre. Kësisoj, rreth 11 mijë doza vaksinash do t’u dedikohen 5400 punonjësve shëndetësorë dhe të moshuarve (nga 10 për qind e popullsisë që vaksinohet në fazën e parë) në dhjetë komuna me shumicë serbe.
“Strategjia e shpërndarjes së vaksinave në këto komuna është e njëjtë me komunat e tjera”, shkruhet më tutje.
Sipas këtij dokumenti 70 faqesh gjatë fazës së parë dhe të dytë do të përdoren vaksinat që do të vijnë nga skema COVAX e Organizatës Botërore të Shëndetësisë, e në fazën e tretë planifikohen ato të kompanisë “Pfizer”.
Në raportin e aprovuar nga MSH-ja janë paraqitur edhe kategoritë që pritet të vaksinohen kundër COVID-19, ku në të parën janë personeli mjekësor, banorët e shtëpive të të moshuarve, personat me sëmundje kronike dhe ata mbi 80 vjeç.
E në fazën e dytë prioritet u është dhënë mësimdhënësve e pjesëtarëve të forcave të sigurisë të përfshirë në menaxhimin e pandemisë. Pra, sipas këtij plani synohet vaksinimi i 70 për qind e popullsisë, apo një milion e 260 mijë persona. /Insajderi.com
