Procesi i privatizimit të pasluftës në Kosovë është një nga proceset më të përfolura. Mendohet se korrupsioni më i madh është bërë pikërisht në këtë proces. Shumë nga fajet e këtij privatizimi të paplanifikuar u lihen qeverive të kaluara. Tani PDK, ka dhënë idenë e formimit të një komisioni që do të zbulojë detaje – për të hetuar fajtorët e vërtetë.
Sot për herë të parë do të mblidhet Komisioni Hetimor Parlamentar lidhur me procesin e privatizimit në Kosovë, njofton Insajderi.
Mbledhja e parë e këtij komisioni të formuar me kërkesën e PDK-së mbahet me fillim prej orës 11:00, ndërsa në rend ditë do te jetë konstituimi i komisionit dhe diskutim lidhur me aktivitetet e komisionit.
Javë më parë, me 77 vota për, Kuvendi i Kosovës formoi Komisionit Hetimor Parlamentar lidhur me procesin e privatizimit në Kosovë, i cili do të ketë 11 anëtarë.
Deputeti Bedri Hamza, tha se PDK ka paraqitur këtë nismë të rëndësishme ligjore në mënyrë që ngjarjet që kanë ndodhur rreth privatizimit të bëhen publike, të vërtetat e të pathënat, por edhe të eliminohen paragjykimet që u janë servuar qytetarëve të Kosovës.
“Kush privatizoi e kush përfitoi nga procesi i privatizimit në Kosovë, me emër e mbiemër të bëhen publike personat fizikë dhe juridikë, të lidhur me politikën, qofshin edhe politikanë, si dhe të specifikohet objekti dhe vlera e privatizimit. Cila është lista e ndërmarrjeve të privatizuara deri më tani, cili është roli i qeverisë ndër vite të privatizimit”, deklaroi ai në seancën e votimit të këtij komisioni./Insajderi.com.
