Ministri i Shëndetësisë, Arben Vitia, do të raportojë të martën nga ora 09:00 në Komisionin për Shëndetësi të Kuvendit të Kosovës – në lidhje me menaxhimin e pandemisë COVID-19.
Ditëve të fundit janë ulur dukshëm infeksionet dhe vdekjet si pasojë e pandemisë, njofton Insajderi.
Instituti Kombëtar i Shëndetit Publik, të martën regjistroi pesë raste të reja. Viktima të reja nuk kishte, sipas raportit njëzetekatër orësh.
Pos situatës epidemiologjike, Vitia do të raportojë edhe për marrëveshjen e arritur me kompaninë e vakisnave “Pfizer”.
Qeveria, javën e kaluar njoftoi se deri në fund të vitit do të arrijnë mbi një milionë e 200 mijë vaksina.
Sipas funksionarëve të shtetit deri në fund të vitit do të vaksinohen 60 për qind e popullsisë.
Deri tash janë vaksinuar mbi tre përqind e popullatës apo 64.776 persona kanë marrë të paktën një dozë vaksine.
Por, Kosova ka ende në dispozicion – vaksina nga donatorët, pasi ka pranuar mbi 178 mijë sosh.
Opozita ka qenë kritike ndaj Qeverisë, që sipas tyre “vaksinat janë vonuar”.
Por, arsyetimi i ekzekutivit ka qenë se “nuk duan vaksina ruse e kinez”. /Insajderi.com