Sherife për të ofenduar, apo Sherife për të treguar ndryshim? “Sherifja” dhe domethënia e këtij emri i ka futur në debat Vjosa Osmanin dhe Mërgim Lushtakun.
Deputeti i Partisë Demokratike të Kosovës, Mërgim Lushtaku, ka marrë fjalën në Kuvendin e Kosovës, ne seancën që po diskutohet rreth dialogut me Serbinë, por paraprakisht i është drejtuar kryetares së Kuvendit, Vjosa Osmani.
Lushtaku duke bërë hyrjen e zakonshme të deputetëve, ku fillimisht përmendin me nderim udhëheqësin e seancës e më pas deputetët i është drejtuar me një emër tjetër kryeparlamentares Osmani.
“E nderuara Sherife Osmani”, i ka thënë Lushtaku kryetares së Kuvendit, e cila – dihet – e ka emrin Vjosa.
Por, Lushtaku po i referohej një fjalimi të djeshëm të Osmanit, e cila tha në gjuhën angleze atë që në shqip i bie “Tash është një sherif i ri në qytet”.
Osmani ia ka kthyer. I ka thënë se ai po tenton ta ofendojë, por s’mund ta bëjë dot.
Por, mbase mund ta ofendojë ndonjë grua shqiptare që e ka emrin Sherife, tha ajo.
Më pas Osmani është lëshuar në një shpjegim etimologjik të fjalisë “there is new sheriff in town”
“Duke tentuar të më ofendoni mua, duke tentuar që ta paraqitni si diçka të keqe, mos harroni që nëna e shumë kujt mund ta ketë emrin Sherife, motra e dikujt mund ta ketë. Ka shumë Sherife në Kosovë të cilat e mbajnë me krenari emrin e tyre”, ka pohuar Osmani.
“Unë do të prisja këtë nga gjenerata më të vjetra, por ju si gjeneratë e re mësoni diçka nga Amerika. Kjo përdorët edhe si gjuhë institucionale, sa herë të vijë një autoritet i ri, që sjellë ndryshim, ky është kuptimi, s’ka të bëjë me policë, ju duhet ta dinit këtë punë. Mësoni pak zotëri deputet, se nuk është mirë të udhëtosh çdo ditë në Amerikë e mos të mësosh gjë nga këto udhëtime”.
Lushtaku e ka marrë fjalën përsëri. Ka pohuar se emrin Sherife nuk e mendoi si ofendim, thjesht e quajti ashtu siç ajo fillimisht e quajti vetën.
“Përsëri, e nderuar sherife Vjosa Osmani pra. Tash po ta them emrin e plotë. Unë në shenjë respekti të thash atë që ia ke thënë vetës”./Insajderi.com
