Gjatë ditës së djeshme (të martën), ka kaluar Projektligji për Rimëkëmbje Ekonomike në Komisionin për Buxhet dhe Transfere të Kuvendit të Kosovës, ndërsa në lidhje me këtë, ka reaguar deputeti i Partisë Demokratike të Kosovës, Mërgim Lushtaku, njofton Insajderi.
“Lajm fantastik, kalimi i Projektligjit për Rimëkëmbje Ekonomike në Komisionin për Buxhet dhe Transfere”, ishin fjalët e Lushtakut në reagimin tij në Facebook.
Më tutje, Lushtaku në status përmend edhe kërkesat e PDK-së të propozuara si amanadamente, ku pos tjerash janë edhe “pako prej 200 milionë eurove për bizneset, mbështetje prej 300 eurove për tre muaj për punëtorët që kanë humbur vendet e tyre të punës për shkak të pandemisë, rimbursimi i 10% të mjeteve të tërhequra nga Fondi Pensional i Kosovës, për të gjithë ata që kanë deri në 9.999.00 euro, lirimi nga TVSh-ja për lëndën e parë e cila prodhohet nga veprimtaritë biznesore, pavarësisht a eksportohen jashtë vendit a jo”.
Gjithashtu, Lushtaku i vë faj Qeverisë që kaq shumë muaj iu deshën që të reflektojnë mbi kërkesat e PDK-së, pasi sipas tij, këto kërkesa i kanë dhënë zgjidhje problemeve të qytetarëve.
Në fund, Lushtaku pohon se pa Partinë Demokratike të Kosovës, “asnjë proces nuk ec përpara dhe se PDK-ja është partia e vetme racionale në Kosovë”. /Insajderi.com
