Dhjetëra qytetarë morën pjesë në meshën e ditës së Pashkëve në Katedralen “Nënë Tereza” në Prishtinë, që për mesazh ka pasur paqen në mes njerëzve.
Don Fatmir Koliqi, i cili e udhëhoqi meshën e ditës së Pashkëve tha se mesazhi që këtë vit ipeshkvi i Kosovës ka zgjedhur është po i njëjti me mesazhin e parë të cilin Jezusi u sjellë apostujve, “paqja me ju”.
Njëri nga pjesëmarrësit në meshën e Pashkëve ishte edhe David Beqiri. Ai tha se kjo festë do të thotë ngadhënjim i dritës ndaj errësirës.
Festa e Pashkëve në Kosovë po festohet në mënyra të ndryshme. Një meshë tjetër është mbajtur edhe në Prizren në Katedralen “Zoja Ndihmëtare” e udhëhequr nga imzot Dodë Gjergji.
Po sonte në Kishën “Shën Ndout” në Ulpianë mbahet një meshë tjetër ndërsa në orën 19:00 në Katedralen “Nëna Terezë” do të bëhet pritja solemne për Pashkë e organizuar nga Ipeshkvi i Kosovës.
