Mjeku kosovar në Berlin kërkon heqjen e kësaj fjalie nga IKSHPK, në raportin ditor të rasteve me Coronavirus

Kardiologu, njëherësh edhe mjek internist, Fahri Beqa, i cili jeton dhe punon për rreth 12 vite në Berlin, ka reaguar ndaj Institutit Kombëtar të Shëndetësisë Publike në Kosovë (IKSHPK), njofton Insajderi.

Në njoftimet e përditshme të IKSHPK-së për sa i përket situatës së krijuar nga Coronavirusi përbrenda 24 orëve, thuhet se viktimat e shënuara nga infektimi me këtë virus kanë pasur edhe sëmundje të tjera shoqëruese.

Me këtë rast, ka reaguar edhe mjeku Beqa, i cili thotë se IKSHPK duhet të largojë nga lajmërimi i përditshëm një pjesë të deklaratës.

Përmes një shkrimi në Facebook, Beqa ka thënë IKSHPK duhet të largojë nga lajmërimi i përditshëm kur konfirmon rastet e reja pozitive dhe të vdekurve, pjesën e fjalisë ku thuhet se “të vdekurit kanë pasur edhe sëmundje të reja shoqëruese”.

Kjo pasi sipas tij, vetëm ai personalisht ka njohur tre persona që kanë vdekur nga COVID-19 e që s’kanë pasur sëmundje të tjera.

“IKSHP definitivisht duhet t’a largojë nga lajmërimi i përditshëm i rasteve të reja pozitive me Sars-Cov2 dhe të vdekurve nga COVID-19 pjesën e fjalisë ku thuhet “të vdekurit kanë pasur edhe sëmundje tjera shoqëruese”. Të paktën personalisht i kam njohur 3 persona që kanë vdekur nga COVID-19 dhe nuk e kanë pasur asnjë sëmundje shoqëruese”, ka shkruar Beqa ndër të tjerash.

Ai tutje thekson se ky veprim tingëllon edhe si relativizim apo arsyetim i vdekjeve.

Beqa shton se nga COVID-19 mund të preken dhe mund të vdesin të gjitha moshat dhe të gjithë pacientët me apo sëmundje shoqëruese.

Postimi i plotë:

IKSHP definitivisht duhet t’a largojë nga lajmërimi i përditshëm i rasteve të reja pozitive me Sars-Cov2 dhe të vdekurve nga COVID-19 pjesën e fjalisë ku thuhet “të vdekurit kanë pasur edhe sëmundje të tjera shoqëruese”.

Të paktën personalisht i kam njohur 3 persona që kanë vdekur nga COVID-19 dhe nuk e kanë pasur asnjë sëmundje shoqëruese.

Përveç tjerash kjo tingëllon edhe si relativizim apo arsyetim i vdekjeve. Nga COVID-19 mund të preken dhe mund të vdesin të gjitha moshat dhe të gjithë pacientët me apo sëmundje shoqëruese. Poashtu edhe mund të shërohen të gjitha moshat dhe pacientët, me apo pa sëmundje shoqëruese. Prandaj nuk është etike e as humane që pacientët me sëmundje shoqëruese të futen automatikisht në kategorinë që ata janë të vetmit që po vdesin nga COVID-19. Sipas statistikave dhe analizave që databazës së të vdekurve në Itali, 28,2% e të vdekurve nuk kanë pasur asnjë sëmundje shoqëruese para pandemisë, dmth kanë qenë plotësisht të shëndoshë.

Prandaj kjo pjesë e fjalisë duhet të hiqet, përndryshe shpërndarja e pasaktë e informacioneve për të vdekurit nga një institucion shëndetësor është ofendim i rëndë dhe mund të ketë edhe konsekuenca juridike që mund të inicohen nga familjarët e të vdekurve. /Insajderi/