Deputeti i Lëvizjes Vetëvendosje, Dardan Molliqaj, ka thënë në “InfoBox” të RTV Dukagjini se kandidatët e partisë së tij do të fitojnë garën në balotazh në Prishtinë dhe në Prizren.
Ai tha se me fitoren në Prishtinë dhe në Prizren, VV do të qeverisë me numrin më të madh të banorëve dhe me buxhetin më të madh.
Molliqaj tha se VV pret fitore edhe në gjashtë komuna të tjera.
“Ne jemi në balotazh në Kaçanik, i cili është bastion i PDK-së. E kemi çuar për herë të parë në balotazh Agim Veliun në Podujevë. Kamenicën e fitojmë pa problem”, tha Molliqaj.
Duke folur për Prishtinën tha se Shpend Ahmeti ka një diferencë të madhe me Arban Abrashin.
“Krahasuar me vitin 2013, në Prishtinë prej partisë së dytë kemi dalë partia e parë. Prej kandidatit të dytë kemi dalë kandidati i parë”, tha Molliqaj.
