Në sheshin “Ibrahim Rugova” në Prishtinë sot është mbajtur marshi me moton “Mos ma kufizo lëvizjen” që ka për qëllim vetëdijesimin e shoqërisë për mungesën e infrastrukturës në Kosovë për personat me aftësi të kufizuara. Në këtë marsh morën pjesë edhe kryeministri Albin Kurti me kryekuvendaren Vjosa Osmanin.
Në një postim në profilin e tij në rrjetin social Instagram, Kurti ka shkruar se është e domosdoshme që ata që kanë nevojat më të mëdha, duhet të ndihmohen më së pari e më së shumti.
“Në botë kemi panumër raste kur njerëz në karrocë i kanë dhënë edhe dije edhe lidership botës. Po i marr dy shembuj: është shkencëtari Stephen Hawking i cili është autori i atij librit të famshëm “Një histori e shkurtër e kohës”, dhe, në anën tjetër është ish presidenti amerikan, ndërmjet dy luftërave botërore dhe gjatë Luftës së Dytë Botërore, Franklin Delano Roosevelt, i cili qysh në moshën 39 vjeçare u pat diagnostifikuar me sëmundjen e polios, e pashërueshme, e cila e degjeneroi fizikun e tij, por jo edhe mendjen”, ka shkruar Kurti.
Tutje ai ka thënë se zyra e tij dhe e kryeparlamentares Osmani do të jetë çdo herë e hapur për personat me nevoja të veçanta.
“Si në Kuvendin e Republikës, te Kryetarja Osmani, ashtu edhe në Qeverinë e Kosovës, tek unë si Kryeministër, do ta keni jo vetëm fizikisht por edhe politikisht e shoqërisht atë shtegun e pjerrët pa pengesa që ua mundëson të vini te zyrat tona që do të jenë gjithnjë të hapura për juve”, ka shkruar kryeministri Kurti në Instagram.
Në marshin e sotëm, kryeministri është parë duke shtyrë karrocën e deputetit të LDK-së, Fetah Rudi.
Fetah Rudi, një ish-mësues dhe aktivist politik, e përdor një karrige me rrota tash e 19 vjet, që kur persona të armatosur ende të paidentifikuar i kishin shkarkuar atij 14 plumba në stomak dhe në shpatull, në një incident që kishte ndodhur në afërsi të fshatit Rud.
Deputeti i LDK-së kishte thënë se plumbat që gati e vranë atë në dhjetor të vitit 2000 – 18 muaj pas përfundimit të luftës dhe largimit të forcave serbe – ishin shtënë nga e njëjta armë që një muaj më parë ishte përdorur për të vrarë gazetarin Xhemajl Mustafa.
