Gjykata Speciale e Kosovës ia ka vazhduar paraburgimin Salih Mustafës, i cili po akuzohet për krime lufte, përcjell Insajderi.com.
Përmes vendimit, Gjykata ka urdhëruar Zyrën e Prokurorit të Specializuar si dhe mbrojtjen e viktimave që nëse dëshirojnë mund të paraqesin parashtrimet e tyre për rishikimin e ardhshëm të paraburgimit deri të hënën më 8 nëntor 2021.
Kurse, për mbrojtjen e Mustafës, afati për parashtrimin e tyre për rishikimin e ardshëm të paraburgimit është caktuar deri më 15 nëntor 2021, raporton “Betimi për Drejtësi”.
Ndërkaq, raportohet se gjatë ditës së hënë do të vazhdojë dëgjimi i dëshmitarit të dytë ndaj Mustafës, i cili ka filluar më 23 shtator 2021.
Aktakuza ndaj ish-pjesëtarit të Ushtrisë Çlirimtare të Kosovës (UÇK), Salih Mustafa, është konfirmuar më 12 qershor 2020.
Bëhet e ditur se në aktakuzën e konfirmuar, Salih Mustafa akuzohet në kuadër të formave të ndryshme të përgjegjësisë penale, për: ndalim arbitrar, trajtim mizor, torturë dhe vrasje të paligjshme si krime lufte të kryera në kontekstin e konfliktit të armatosur jo ndërkombëtar në Kosovë, ose në lidhje me atë konflikt./Insajderi.com
