Ministrja e Arsimit, Shkencës, Teknologjisë dhe Inovacionit, Arbërie Nagavci, njoftoi të mërkurën se ditëve të fundit ka pranuar ankesa të shumta në lidhje me mungesën e disa teksteve shkollore dhe për këtë fajësoi Drejtoritë Komunale të Arsimit.
Siç bëri të ditur ajo, ministria ka vërejtur se në disa raste DKA-të nuk kanë qenë në nivelin e duhur të detyrës, duke mos planifikuar tekstet për nxënësit e të gjithave shkollave dhe duke mos bërë kërkesë të saktë në raport me numrin e nxënësve.
E madje, sipas saj, në disa raste komisionet për pranimin e teksteve janë formuar me persona jo kompetent (punëtorë teknik).
Tekstet shkollore
Këtë ministrja Nagavci tha se e ka kuptuar pasi për shkak të shqetësimeve nga ana e prindërve dhe njoftimeve nga disa mësimdhënës, ka dërguar disa komisione që të bëjnë vizita në shkolla për t’u siguruar nëse procesi i shpërndarjes së teksteve nga DKA-të është realizuar në bazë të kërkesave të parapara.
“Ju informoj se më 15 qershor, Ministria e Arsimit ka njoftuar të gjitha Drejtoritë komunale të Arsimit se këtë vit do të shpërndajë tekstet për nivelin I-5 dhe për nxënësit e klasës së 8, tekstet alternative për nxënësit e klasave 6 dhe 7 si dhe tekstet shkollore për lëndën e gjuhës gjermane dhe frënge”.
“Njëkohësisht, MASHTI i ka njoftuar DKA-të se sipas udhëzimit Administrativ nr.13/2016, tekstet e klasës 6, 7 dhe 9 do të përdoren të vitit paraprak andaj shkollat është dashur të sigurohen që nxënësit e këtyre klasave t’i kthejnë tekstet në fund të vitit shkollor”.
“Bazuar në kërkesat që i kanë bërë komunat, MASHTI i ka kontraktuar shtëpitë botuese dhe e ka bërë shpërndarjen e teksteve shkollore. Pra, shpërndarja e teksteve është bërë në respektim të plotë të kërkesave që kanë ardhur nga Drejtoritë Komunale të Arsimit. Ju informoj se si Ministri, nuk kemi pranuar asnjë ankesë në raport me tekstet shkollore nga Drejtoritë Komunale të Arsimit”, ka shkruar ajo në profilin e saj në Facebook.
Në fund, ka inkurajuar shkollat dhe DKA-të që ta marrin me prioritet trajtimin e çështjes së teksteve mësimore dhe të sigurohen që të gjithë nxënësit t’i kenë tekstet e të vazhdojnë procesin mësimor.
Nëse ka pasur ndonjë mospërmbushje të obligimeve nga ana e MASHTI-t, Nagavci shtoi se “jemi të gatshëm ti plotësojmë menjëherë edhe pse deri tash nuk e kemi asnjë informatë të tillë”./Insajderi.com
