Naim Maloku, është ftuar sot nga Gjykata Speciale në Hagë. Ish-eprori i lartë i Ushtrisë Çlirimtare të Kosovës, është lajmëruar nga Lubjana sot, dhe në një intervistë për Info Magazinë, ka thënë se gjendja shëndetësore ia pamundëson t’i përgjigjet ftesës.
“Më tha që jam i ftuar nga Gjykata Speciale në cilësinë e dëshmitarit, ndërsa unë i tregova për gjendjen time shëndetësore. I tregova që është e pamundur që në dy muajt e ardhshëm të kem lëvizje në ndonjë perimetër më të gjatë sesa disa metra nga banesa”.
Maloku ka thënë se ia ka shpjeguar përfaqësuesit të Gjykatës Speciale që e ka telefonuar se gjendja shëndetësore ia pamundëson udhëtimin për t’u intervistuar në Hagë.
“Ata e pranuan si fakt, ndërsa unë ua dhashë edhe emrat e mjekëve që më kanë operuar dhe vazhdojnë të më trajtojnë. Unë do të kthehem më 22 korrik prapë në Institutin e Onkologjisë të Lubjanës për trajtim pas operacionit”.
“Ua dhashë edhe datat e kontrolleve dhe incizimeve mjekësore që duhet t’i bëj në Qendrën Klinike Universitare të Lubjanës dhe në Institutin e Onkologjisë këtu. Ata u pajtuan me këtë”.
“Personi që më ka kontaktuar nga Gjykata Speciale u soll mirë dhe e kuptoi gjendjen time shëndetësore. Nëse duan, mund të kontaktojnë me mjekët dhe ta vërtetojnë edhe nga ata gjendjen time shëndetësore”.
Ai ka deklaruar se nuk e ka befasuar ftesa që e ka marrë nga Specialja.
“Është hera e parë që Gjykata Speciale kontakton me mua. Nuk më befasoi asgjë, unë e prita shumë qetë”.
“Nuk kam çfarë ta fsheh gjendjen time, as para opinionit dhe as para Gjykatës”.
“Unë jam duke u përballur me një sëmundje të rëndë që nga muaji shtator i vitit të kaluar. Jam në Slloveni dhe trajtimin jam duke e kryer në Institutin e Onkologjisë dhe Qendrën Klinike Universitare të Lubjanës”.
Por, ish-eprori i UÇK-së nuk e di se për çfarë rasti është ftuar nga Gjykata Speciale që të dëshmojë.
“Nuk di as për çfarë rasti jam i ftuar dhe ku dhe me çfarë lidhet emri im. Nuk kam kërkuar shpjegime”.
Naim Maloku ka ripërsëritur se gjendja e tij shëndetësore ia pamundëson lëvizjen nga vendi ku po trajtohet, prandaj edhe nuk mund të paraqitet pranë Gjykatës Speciale për ta dhënë dëshminë e tij.
Por, ai është shprehur i hapur për intervistim nga kjo Gjykatë, në rast se përfaqësuesit e kësaj të fundit shkojnë në Lubjanë të Sllovenisë ku ai edhe është duke u trajtuar.
“E kanë numrin e telefonit tim dhe janë të njoftuar me gjendjen time shëndetësore. Nëse duan të komunikojnë me mua mund të vijnë në Lubjanë, përndryshe unë nuk mund të lëviz”./ Insajderi.com
“Më 15 tetor kam sërish kontrollë te kirurgu që më ka operuar i cili edhe do ta caktojë datën e operimit të dytë”.
