Në nder të profesionistëve shëndetësorë që kanë humbur jetën si pasojë e infektimit me Coronavirus, sot janë nderzur qirinj para Emergjencës së Qendrës Klinike Universitare të Kosovës.
Odat e profesionistëve shëndetësorë kërkuan që të ndizen qirinj për ata që e humbën betejën me Coronavirusin, ndërsa të fiken dritat në çdo shtëpi për një minutë në përkrahje të te gjithë mantelbardhëve qe janë në vijën e parë te frontit në luftën me pandeminë.
Udhëheqësit e institucioneve shëndetësore ju bashkuan thirrjes për ndezje të qirinjve e bashkë me ta edhe ministri i Shëndetësisë, Armend Zemaj, i cili tha se ndajnë dhimbjen për humbjen e profesionistëve shëndetësorë, por edhe ndjehen krenarë me punën e tyre.
“Si Ministri e Shëndetësisë shprehim konsideratën për punën, përkushtimin e tyre gjatë gjithë jetës në shërbim të qytetarëve të Kosovës me ruajtjen e shëndetit të tyre por fatkeqësisht 13 nga ta pësuan nga virusi Covid-19 dhe ne sot ndajmë dhimbjen por njëherit krenarinë për punën e tyre dhe përkushtimin sidomos gjatë kësaj faze kur po përballemi ne dhe gjithë globi në luftimin e kësaj pandemie”, tha Zemaj.
Qirinj në nderim të mjekëve të vdekur nga Covid-19, sonte janë ndezur para çdo institucioni shëndetësor në vend, ndërsa edhe dritat u fikën për një minutë, shkruan KP.
Mbi 12 mijë persona në Kosovë janë prekur me Covid19, në mesin e tyre edhe profesionistë shëndetësor. 13 prej tyre e kanë humbur jetën. /Insajderi.com
