Testi i Arritshmërisë për nxënësit e klasëve të nënta do të mbahet të premten e 28 majit, njofton Insajderi.
Ministria e Arsimit, Shkencës, Teknologjisë dhe Inovacionit njofton se për shkak të pandemisë, “forma e organizimit të sistemimit të nxënësve në klasë, duhet të realizohet një nxënës në një bankë, kurse në çdo klasë do të lejohen vetëm nga 15 nxënës”.
Në njoftim thuhet se në koordinim me drejtoritë komunale të arsimit dhe me shkollat, MASHT-i ka realizuar të gjitha përgatitjet e duhura për organizimin e këtij testi.
“Ministria e Arsimit është e vendosur dhe e përkushtuar për organizimin dhe zhvillimin e një procesi të mirëfilltë e të besueshëm, ndërsa ndaj të gjithë personave të angazhuar në proces, të cilët nuk i realizojnë detyrat e caktuara me kompetencë dhe profesionalizëm të lartë, do të kërkohet përgjegjësi”, thuhet në njoftimin për media.
MASHTI fton të gjithë akterët e përfshirë në këtë proces, që të respektohen në përpikëri rregullat dhe masat kundër COVID-19.
Ministria e Arsimit, Shkencës, Teknologjisë dhe Inovacionit kërkon që çfarëdo parregullsi eventuale në qendrën e testimit, të raportohet me shkrim në DKA dhe në MASHTI.
Rezultatet e Testit të Arritshmërisë pritet të shpallen më 7 qershor./Insajderi.com
