Nga VV-ja fajësojnë deputetin e PDK-së për skadimin e afatit të vaksinave
Insajderi
Zëdhënësi i Lëvizjes Vetëvendosje, Arlind Manxhuka, ka fajësuar deputetin e Partisë Demokratike të Kosovës, Bekim Haxhiun, për asgjësimin e mbi 100 mijë vaksinave kundër COVID-19 të AstraZeneca-s, pasi iu ka skaduar afati.
Rreth një muaj më parë, Haxhiu kishte deklaruar se vaksinat AstraZeneca të cilat Kosova I kishte pranuar donacion nga Norvegjia nuk është dashur të pranoheshin, pasi sipas tij, “këto vaksina i kanë larguar nga përdorimi vendet e BE-së për personat nën 65 vjeçar”.
Madje, ai u kishte bërë thirrje qytetarëve që të shikojnë afatin e skadimit para se të vaksinohen.
E sipas Manxhukës, “këto gënjeshtra” kanë bërë që njerëzit të hamendësohen dhe vaksinave të iu skadojë afati i përdorimit.
“Vaksinave që dje u doli afati e u asgjësuan, për të njëjtat Bekim Haxhiu-Kamishi pati thënë se u skadon afati në qershor dhe këto deklarata janë publike. Pra, gënjeshtra të tilla në Kuvendin e Kosovës dhe jashtë kanë bërë që njerëzit të hamendësohen dhe vaksinat te mos shfrytëzohen”, ka shkruar ai në profilin e tij në Facebook.
Ndryshe, Bekim Haxhiu i PDK-së, njihet si kritik i zëshëm i Qeverisë Kurti në raport me menaxhimin e pandemisë COVID-19. Ai disa herë ka kërkuar shkarkimin e ministrit të Shëndetësisë, Arben Vitia, pas zyrtarizmit të kandidaturës së këtij të fundit për kryetar të Prishtinës në zgjedhjet lokale të 17 tetorit, duke thënë se “ka dështuar në menaxhimin e pandemisë”./Insajderi.com
