Lëvizja Vetëvendosje nuk ndalet në kundërshtimin e saj ndaj Qeverisë Hoti, pasi tani do të fillojë peticioni për shkarkimin e kësaj qeverie.
Shefi i Grupit Parlamentar të LVV-së, Rexhep Selimi, ka thënë se subjekti opozitar ka nisur peticionin për mocion mosbesimi ndaj Qeverisë Hoti.
Pas vendimit të Gjykatës Kushtetuese që i kishte dhënë të drejtë Lidhjes Demokratike të Kosovës ta formonte Qeverinë – subjekti politik që drejtohet nga Albin Kurti, kishte filluar peticionin, ‘Duam zgjedhje të reja”, njofton Insajderi.
Nënkryetarja e Kuvendit të Kosovës, Arbërie Nagavci, tha se Qeveria Hoti e ka kolapsuar tërësisht sistemin shëndetësor edhe ashtu të brishtë.
“Përveç kolapsit në shëndetësi, kjo qeveri ende nuk ka plan konkret për rimëkëmbje ekonomike. Kjo qeveri po e çon vendin drejt një katastrofe humanitare”, tha ajo.
Lëvizja Vetëvendosje nuk e njehë Qeverinë Hoti si legale, ajo i drejtohet “Qeveria Koti”, pikërisht për këtë etiketim kishte pasur debat të ashpër mes dy subjekteve politike që kanë qeverisur bashkë vetëm pak muaj më parë /Insajderi.com/
