Presidentja e Kosovës, Vjosa Osmani priti të martën në takim ambasadorin e Norvegjisë, Jens Erik Grøndahl, me të cilin diskutoi për vendimin e Kosovës për të ofruar mbrojtje të përkohshme dhe të menjëhershëm për qytetarët afganë, të cilët janë larguar nga Afganistani pasi vendi u pushtua nga talebanët.
Në takim, ambasadori Grøndahl shprehu vlerësimin e Mbretërisë së Norvegjisë për këtë vendim të institucioneve të Kosovës.
Ndërsa, Osmani i shprehu falënderim ambasadorit për mbështetjen e gjithanshme të këtij shteti ndaj institucioneve të Kosovës, duke përfshirë në menaxhimin e pandemisë dhe ngritjen e kapaciteteve për politikbërje efikase.
“Në këtë drejtim, Presidentja Osmani vlerësoi mbështetjen e Ambasadës së Mbretërisë së Norvegjisë, e cila nëpërmjet një Memorandumi të Mirëkuptimit do t’i ofroj Zyrës së Presidentes, ekspertizë në fushën e politikës së jashtme dhe sigurisë, si dhe fushat e tjera, varësisht nga nevoja”, thuhet në njoftimin për media të Zyrës së Presidentes.
Pos Kosovës, edhe Shqipëria ka pranuar refugjatët afganë.
Strehimi i tyre është i përkohshëm, deri në përmbylljen e procesit të dokumentacionit për emigrim në Shtetet e Bashkuara të Amerikës apo në ndonjë shtet të Bashkimit Evropian./Insajderi.com
