“Distancën ju kisha lut, sidomos të Presidenti të unë afrohuni sa të doni, te Presidenti dy metra”.
Kështu ju thoshte Naser Ramadani nga Instituti Kombëtar i Shëndetësisë Publike gazetarëve, kur doli më 20 mars në një konferencë të përbashkët me Presidentin Hashim Thaçi.
Vetëm tetë më pas – qeveria në detyrë e Albin Kurtit e ka shkarkuar komplet Bordin e Shërbimit Spitalor Klinik – kryesues i të cilit ishte Naser Ramadani.
Gazeta Insajderi, i ka kërkuar arsyet e shkarkimit të Ramadanit nga Zyra e Kryeministrit.
“Përgjigjen në pyetjen tuaj mund ta gjeni pikërisht në arsyetimin e vendimit”.
Bordi Drejtues i SHSKUK-së sipas vendimit të Qeverisë u shkarkua për arsye se nuk i ka përmbushur detyrat dhe përgjegjësitë e rëndësishme të përcaktuara me Statutin e SHSKUK-së dhe ka dështuar në arritjen e objektivave.
Zyra e Kryeministrit thotë se vendimi nuk e ka shkarkuar specifikisht Ramadanin.
“Vendim nuk e ka shkarkuar personalisht dhe specifikisht z. Naser Ramadanin, por të gjithë Bordin Drejtues të Shërbimit Klinik Universitar të Kosovës, dhe si pasojë edhe z. Naser Ramadanin si kryesues i tij”, thuhet në përgjigjen e Zyrës së Albin Kurtit.
Gazeta Insajderi rreth kësaj çështjeje e ka kontaktuar edhe Naser Ramadanin, por i njëjti që nga mëngjesi nuk ka qenë i qasshëm.
Në vendimin e shkarkimit të Bordit, Kurti ka emëruar gjashtë anëtarët e ri të Bordit i cili do të funksionalizohet nga e hëna./Insajderi.com
