Dy persona janë arrestuar, ndërsa është konfiskuar një sasi e aparateve të lojërave të fatit, shtëpiza kompjuterike, laptopë, pistoletë, gjeneratorë e para të gatshme – gjatë operacionit policor që u zhvillua mëngjesin e së mërkurës në fshatin Karaçevë të Kamenicës.
Operacioni për “Organizim të skemave piramidale dhe bixhozit të paligjshëm”, është realizuar nga Drejtoria Rajonale e Policisë së Kosovës, Gjilan, në bashkëpunim me Prokurorinë Themelore në Gjilan.
“Operacioni policor ka filluar që në orët e hershme të mëngjesit si rezultat i një hetimi në vazhdimësi dhe të bashkërenduar mes Policisë së Kosovës dhe Prokurorisë Themelore në Gjilan, lidhur me pretendimet për veprimtari të paligjshme, përfshirë bixhozin e paligjshëm dhe aktivitete tjera”.
Bëhet e ditur se si vazhdimësi e operacionit janë kontrolluar shtëpitë dhe objektet përcjellëse ku jetojnë të dyshuarit si dhe objektet tjera ku janë zhvilluar veprimtaritë e lojërave të fatit.
Gjatë kontrollit janë gjetur dhe sekuestruar në cilësinë e provave materiale:
96 aparate të lojërave të fatit, katër shtëpiza kompjuterike, tre laptopë, tre monitorë, dy TV që janë përdorur për lojëra të fatit, një pistoletë e llojit Ekol special 99 së bashku me 17 fishekë, një gjenerator si dhe 469,15 euro (të gjetura në aparatet e lojërave të fatit).
“Të gjitha aparatet (96 copë) dhe një gjenerator sipas procedurave të parapara iu janë dorëzuar Doganës së Kosovës për procedura të mëtutjeshme”.
“Në vendngjarje në fshatin Karaçevë, Inspeksioni Komunal i Komunës së Dardanës ka asistuar Policinë e Kosovës në rrënimin e tri objekteve të cilat janë ndërtuar pa leje në të cilat kanë qenë duke u ushtruar veprimtaritë e kundërligjshme të lojërave të fatit, ndërsa një objekt tjetër, është mbyllur dhe shirituar nga Inspeksioni Komunal, Dardanë”, thuhet tutje.
Lidhur me këtë rast hetimet janë në vazhdim e sipër dhe në kërkim të personave tjerë si të dyshuar të mundshëm të përfshirë në këtë rast.
“Rasti është duke u hetuar nga Drejtoria Rajonale e Policisë së Kosovës në Gjilan në koordinim të ngushtë me Prokurorinë Themelore, përfshirë edhe kërkimin e disa personave të tjerë si të dyshuar të mundshëm”, vijon komunikata./Insajderi.com
