Presidentja e Kosovës, Vjosa Osmani, deklaroi të hënën se Agjencia për Informim dhe Privatësi do ta ketë përkrahjen e institucioneve të vendit.
Osmani këtë e bëri të ditur në takim me komisioneren për Informim dhe Privatësi, Krenare Sogojevën.
Në takim presidentja theksoi se Agjencia për Informim dhe Privatësi, në krye të së cilës është zgjedhur pak kohë më parë Sogojeva, është institucion i rëndësishëm shtetëror, “i cili e mbron të drejtën e pakontestueshme të qytetarëve të vendit për privatësi”.
“Si e tillë, kjo agjenci do ta ketë përkrahjen e institucioneve të Kosovës, në mënyrë që të sigurohemi se ajo do ta kryejë punën në përputhje me ligjin dhe me mandatin që e ka, që qytetarët e vendit të përfitojnë nga puna e saj”, thuhet në njoftimin e Presidencës.
Në anën tjetër, Sogojeva, siç bëhet e ditur në njoftim, e falënderoi presidenten Osmani për pritjen dhe e siguroi atë se do të bëjë gjithë ç‘është në dorën e saj që ta fuqizojë rolin e agjencisë, në mënyrë që agjencia të sigurojë mbrojtje të plotë të privatësisë së qytetarëve./Insajderi.com
