Presidentja e Republikës së Kosovës, Vjosa Osmani, ka marrë pjesë në ndarjen e çmimeve të Lidershipit të Shquar 2021 në Këshillin Atlantik, ku prezente ishte edhe artistja shqiptare me famë ndërkombëtare, Dua Lipa, njofton Insajderi.com.
Osmani në fjalën e saj tha se ndihet krenare që përfaqëson një popull që ka kaq shumë dhembshuri, talent e potencial.
Shefja e shtetit më tej tha se Kosova është storia më e madhe e suksesit në politikën e jashtme.
“Mbështetja juaj ka qenë e paçmueshme. Por sot ne përballemi me shumë sfida, dhe ne shpresojmë të vazhdojmë të mbështetemi te të gjithë ju, ndërsa hapim një kapitull të ri në përpjekjet tona për të forcuar pozitën ndërkombëtare të Kosovës. Kosova është fener i shpresës dhe i demokracisë. Vetëm 13 vite nga shpallja e pavarësisë tonë, sot ne kemi atë lloj të stabilitetit institucional, që shumë vende të tjera mund ta ëndërrojnë”, është shprehur Osmani.
Mbështjetja që Kosova i dha shtetasve afganë me strehimin e tyre ishte një tjetër çështje, të cilën Osmani nuk la pa e përmendur në fjalimin e saj.
“Ne u jemi bashkuar aleatëve tanë në misionet paqeruajtëse dhe jemi të nderuar që jemi ndër shumë vendet që ju kemi ofruar strehim Afganëve. Ne ishim vendi i parë që ju përgjigjem kësaj thirrje, sepse ne vetë ishim refugjatë. Kështu që ne nuk hapëm vetëm dyert, por gjithashtu mendjet dhe zemrat tona për të gjithë ata që kishin nevojë, dhe ne nuk mund të qëndronim indiferent ndaj aleatëve tanë në këtë përpjekje të rëndësishme”.
“Jam shumë krenare të përfaqësoj një popull që ka kaq shumë dhembshuri, shumë talent dhe potencial që konfirmojnë qëndrueshmërinë se Kosova do të vazhdojë të forcoj shtet-ndërtimin e saj dhe do të jap një kontribut të madh në komunitetin ndërkombëtar për paqen e stabilitetin në rajon”, tha Osmani. /Insajderi.com
