Që nga zgjedhjet lokale 2017 disa parti politike nuk i kanë shlyer borxhet nga dënimet për shkelje gjatë fushatës zgjedhore që janë dhënë nga Paneli Zgjedhor për Ankesa dhe Parashtresa (PZAP).
Edhe pse Buxheti i Kosovës ua ndanë më shumë se 4 milionë euro në vit partive politike të përfaqësuara në Kuvendin e Kosovës, ato janë arsyetuar se nuk kanë mjete financiare për t’i paguar dënimet.
Ndër partitë që ende nuk e kanë paguar asnjë cent nga këto dënime janë Lidhja Demokratike e Kosovës (LDK), Aleanca për Ardhmërinë e Kosovës (AAK) dhe Alternativa. Kurse Partia Demokratike e Kosovës (PDK) e ka paguar gjysmën e borxhit.
Lidhja Demokratike e Kosovës ka shumën më të madhe të borxhit më mbi 78 mijë euro. Zyrtari financiar në këtë subjekt, Lutfi Zharku ka thënë se “pas marrjes se mjeteve nga Komisioni Qendror i Zgjedhjeve (KQZ) për tre mujorin e dytë të këtij viti, do paguajnë borxhin në PZAP”.
Kurse, Aleanca për Ardhmërinë e Kosovës ishte gjobitur më 17,200 euro, borxh ky që ende figuron në PZAP.
Sekretari ekzekutiv i Aleancës për Ardhmërinë e Kosovës, Valon Tolaj, ka thënë për Radion Evropa e Lirë, se në mungesë të mjeteve buxhetore ka mbetur obligimi financiar i papërfunduar.
Megjithatë, edhe Tolaj shprehet se presin nga Komisioni Qendror i Zgjedhjeve që të rimbursojë mjetet për këtë parti, pastaj të përfundojnë obligimin.
“Në momentin që do kemi rimbursim të mjeteve nga KQZ-ja, ne do të bëjmë pagesën e obligimeve. Ose KQZ-ja do të bëjë ndalesën e mjeteve tona dhe i dërgon drejtpërdrejt në PZAP në emër të AAK-së,” ka thënë Tolaj.
Partia Demokratike e Kosovës ka qenë e gjobitur më rreth 35 mijë euro, ka paguar 18 mijë prej tyre dhe ka mbetur mbi 16 mijë euro borxh.
Basri Musmurati, sekretar i kësaj partie në një prononcim për Radion Evropa e Lirë, shkurt është përgjigjur se shumë shpejtë do shlyejë borxhin.
“Shpejt e përfundojmë obligimin sepse nuk kemi pasur mjete financiare, kjo është arsyeja”, ka thënë Musmurati.
Ndërkaq, partitë që i kanë paguar dënimet janë Lëvizja Vetëvendosje, Aleanca Kosova e Re (AKR), Nisma për Kosovën dhe Lista Serbe. Njëjtë kanë vepruar edhe partitë tjera që kanë qenë të dënuara.
