Ministri i Punëve të Jashtme të Kosovës, Behgjet Pacolli ka njoftuar sot se i ka shkruar letër Përfqësueses së Lartë të Bashkimit Evropian, Federica Mogherinit pas arrestimit të zyrtarit të Administratës Tatimore të Kosovës (ATK), në Serbi.
Përmes një postimi në llogarinë e tij në Facebook, Pacolli ka thënë se për të disatën herë i ka shkruar Mogherinit ku ka shprehur shqetësimin për arrestimet dhe kërcënimet e vazhdueshme të qytetatëve te Kosovë nga autoritetet serbe.
“Unë i kam shkruar sot, për të disatën herë, Federica Mogherinit Përfaqësuese e Lartë e Bashkimit Evropian për Punë të Jashtme për të shprehur shqetësimin e thellë të Republikës së Kosovës për arrestimin dhe kërcënimin e vazhdueshëm të qytetarëve të Kosovës nga autoritetet serbe në kundërshtim me marrëveshjen e lëvizjes së lirë dhe të drejtat e tyre themelore”, ka shkruar Pacolli.
Pacolli ka thënë se i bënë thirrje BE-së që të marr veprime ndaj Beogradit, ndryshe Kosova është e gatshme të marrë masa për të reaguar.
“Unë i bëj thirrje BE-së që të ndërhyjë dhe të ndalojë këto veprime nga Beogradi. Kosova është e gatshme të marrë masa për të reaguar dhe për të mbrojtur qytetarët e saj të të gjitha përkatësive etnike dhe fetare”, ka përfunduar Pacolli.