Mediat kosovare sot kanë publikuar videot me pamje të momentit kur shtetasit turq të arrestuar para dy ditësh kanë hipur në aeroplanin special për transferim në Turqi. Dëbimi i tyre është kryer nga Aeroporti i Prishtinës të enjten pas orës 11 të paradites.
Por, avokati Leutrim Syla është i shqetësuar se nuk janë publikuar edhe pamje të klientit të tij Cihan Özkan dhe se ai dhe familja e klientit të tij nuk dinë ende asgjë për vendndodhjen e tij.
Të arrestuarit janë identifikuar si Cihan Özkan, Kahraman Demirez, Hasan Hüseyin Günakan, Mustafa Erdem, Osman Karakaya dhe Yusuf Karabina. Ata janë arrestuar si të dyshuar për lidhje me klerikun Fetullah Gylen, i cili konsiderohet si një nga kundërshtarët më të mëdhenj të presidentit turk Erdogan.
Ndryshe, Syla ka njoftuar se nga kontaktet e tij që ka me Turqinë ka arritur të mësojë se avokati i grupit të të arrestuarve tashmë ka arritur të depërtojë në qëndrën ku po mbahen të arrestuarit në Turqi, por ai ende nuk di asgjë edhe për klientin e tij Cihan Özkan.
Özkan ishte arsimtar në shkollën “Mehmet Akif” në Lipjan.