Lidhja Demokratike e Kosovës e konsideron punë të kryer marrëveshjen ndërmjet Kosovës dhe Malit të Zi për demarkacionin e kufirit ndërmjet dy vendeve.
Anëtari i Kryesisë së LDK-së, Skender Hyseni, ka thënë në Klan Kosova se marrëveshja e demarkacionit me Malin e Zi s’ka arsye të negociohet më.
Ai ka deklaruar se ka besim të plotë që institucionet e vendit që janë marrë me këtë çështje e kanë kryer punën e tyre me përgjegjësi dhe profesionalizëm të madh.
“Komisioni Shtetëror ka prodhuar një raport të cilin e kanë nënshkruar të gjithë anëtarët. Ajo është vija e saktë e kufirit. Më pas atëbotë ministri i Jashtëm, Hashim Thaci, i ka kërkuar leje presidentes Atifete Jahjaga për të nënshkruar marrëveshje me Malin e Zi”, është shprehur Hyseni.
“Ne mund të shfaqim dilema dhe dyshime të llojllojshme për këtë cështje. Por s’mund të jenë krejt qytetarët e Kosovës gjeodetë. Unë besoj fort tek institucionet, tek ekspretët. Territori i Kosovës mbetet i paprekur. Ne nuk do të pranonim asnjëherë që qoftë edhe një metër katror territor i republikës të shkojë kudoqoftë”, ka thënë Hyseni. /Insajderi.com
