Mediumi i afërt me nënkryetarin e PDK-së, Rexhep Hotin, hedh akuza për bashkë partiakun e tij. Pohon se Enver Hoxhaj ka shkuar natën dhe e ka uzurpuar zyrën, ku duhet të vendoset Behgjet Pacolli, zv/kryeministri i parë i Kosovës.
Portali “Infopress”, i afërt me nënkryetarin e PDK-së, Rexhep Hotin, ka publikuar sot një ekskluzive kundër Enver Hoxhajt, zv/kryetar i partisë. Portali ka shkruar se Hoxhaj ia ka uzurpuar zyrën Behgjet Pacollit, zëvendës kryeministrit të parë të Qeverisë së Kosovës.
Zyra ku është akomoduar Hoxhaj, sipas “Infopress”, është e paraparë vetëm për zv/kryeministrin e parë, por jo edhe të tjerët.
“…mbrëmë natën ka shkuar Enver Hoxhaj dhe e ka uzurpuar zyrën dhe i ka çuar dokumentet e veta si zëvendëskryeministër jo i pari, por i dyti a i treti dhe tashti natyrisht duke kërkuar zyrën e vet zëvendëskryeministri i parë që i takon ne Qeveri, ai e ka pa që tash e ka zyrën e uzurpuar”, shkruan “Infopress”.
I njëjti portal edhe dje ka publikuar një artikull kundër Enver Hoxhajt. Ka shkruar se Hoxhaj kishte kërkuar dy poste qeveritare, por partia kishte përdorur “taktikën e vjetër e cila ka funksionuar gjithmonë”.
“Përmendja e aktualizimit të «dosjeve» të fjetura në prokurori ndaj e bën z. Enver Hoxhaj të bëhej shumë i urtë. Në çast, ai pushoi ‘të thithte dy nëna së bashku me dashin e kopesë’ në PDK. Ai sakaq u pajtua me çka do!”, ka shkruar dje portali “Infopress”.
Gjuha e ashpër e portalit të afërt me Rexhepin Hotin përfshin edhe akuza tjerë për kolegun e tij partiak, Enver Hoxhajn.
“Mirëpo, z. Hoxhaj, ç’është e vërteta, gënjeshtrat i bën gjithmonë me marifet. Dëm i madh që ky personalitet me kapacitet të madh intelektual u bë shërbëtor pa kushte i uzurpatorëve të pagdhendur të PDK-së”, është akuza tjetër që i bëhet Hoxhajt nga portali i afërt me nënkryetarin e PDK-së, Rexhep Hotin.
Rexhep Hoti gjatë viteve 2007-2009 kishte udhëhequr Gazetën “Infopres”, e cila publikohej në print dhe i shërbente Hashim Thaçit. Më pas, e kishte mbyllur. Portali “Infopress”, zyrtarisht nuk menaxhohet nga Hoti. Por, ai është i pranishëm aty me shkrime të ndryshme dhe portali ka ruajtur logon dhe dizajnin e njëjtë, të cilën medium e kishte kur botohej në print.
