Federata e Sindikatave të Shëndetësisë së Kosovës (FSSHK), ka pezulluar protestën e paraparë për nesër, më 12 gusht, njofton Insajderi.
Vendimi për pezullimin e kësaj proteste ka ardhur pas takimit me ministrin e Shëndetësisë, Armend Zemaj, i cili ka premtuar se do të realizohen kërkesat e FSSHK-së.
“Zemaj u zotua se kërkesat e FSSHK-së do të realizohen dhe për këtë ka marrë edhe mbështetjen e kryeministrit, si dhe pas vendimit për ndalimin e protestës nga ana e organeve të rendit, Këshilli Organizativ i Protestës duke i respektuar zotimet e ministrit, institucioneve shtetërore të MPB-së si dhe shëndetin e popullatës merr vendim që të pezullojë protestën e paraparë me datë 12.08.2020 dhe t’i hap rrugë dialogut social”, thuhet në njoftimin e FSSHK-së.
Federata e Sindikatave të Shëndetësisë së Kosovës ka kërkuar rritje të pagave për punëtorët shëndetësorë dhe jo shtesa siç ka parashikuar Qeveria e Kosovës. /Insajderi.com/
