Ambasada amerikane në Kosovë ka publikuar në llogarinë e saj në Facebook, një video të ambasadorit të ri Jeff Hovenier, ku prezanton biografinë e tij dhe bën tri premtime për Kosovën.
Qytetarëve u ka premtuar se do të punojë për “një Kosovë plotësisht të angazhuar dhe të integruar në rajon dhe në institucionet evropiane dhe euro-atlantike, me marrëdhënie të përmirësuara, të normalizuara me fqinjët e saj”.
Po ashtu, për “një Kosovë me institucione publike të qëndrueshme, të besueshme dhe efikase që ofrojnë shërbime, ndajnë drejtësi, i mbrojnë të drejtat dhe liritë e të gjithë kosovarëve”.
Hovenier mes tjerash ka thënë se të arriturat e Kosovës përgjatë 13 viteve të kaluara “janë thjeshtë mrekulli – një demokraci e gjallë, ekonomi e aftë, si dhe lidershipin që Kosova e përçon përtej kufijve të saj”.
Megjithatë, sipas tij, ka ende punë të pakryera.
Për Hovenier Kosova dhe historia e sajnuk janë të panjohur për të, pasi ka qenë pjesëtar i delegacionit amerikan në procesin e Rambujesë, e po ashtu në vitin 2006, ka qenë në ekipin e OKB-së, të udhëhequr nga i dërguari i posaçëm, Marti Ahtisari, që ishte përgjegjës për negociatat për statusin.
“Në vitin 1999, përderisa po punoja në misionin e SHBA-së në OSBE, shërbeva si pjesëtar i delegacionit amerikan në procesin e Rambujesë”, është shprehur ai.
“Gjithashtu, në vitin 2006, kam qenë në ekipin e OKB-së, të udhëhequr nga i dërguari i posaçëm, Marti Ahtisari, që ishte përgjegjës për negociatat për status”.
“Më vonë gjatë karrierës sime, në Këshillin Kombëtar të Sigurisë së Shtëpisë së Bardhë, kam punuar në politikat e SHBA-së për Ballkanin Perëndimor, përfshirë ato për normalizimin e marrëdhënieve Kosovë-Serbi”.
Në fund, ambasadori amerikan ka thënë se është krenar për rolin që ka luajtur në mbështetjen e popullit të Kosovës, dhe se “jam edhe më i ngazëllyer se çka mund të arrijmë së bashku për të ardhmen e Kosovës”./Insajderi.com
