Një grua ka raportuar se është dhunuar nga pesë persona dhe është detyruar nga po të njëjtit të konsumojë substance narkotike për pesë ditë me radhë, njofton Insajderi.
Kështu bëhet e ditur në raportin 24 orësh të Policisë së Kosovës, ku thuhet se viktima është paraqitur në stacionin e policisë dhe ka thënë se rasti ka ndodhur më datë 30 prill, kur ajo e kishte takuar të dyshuarin, i cili pa dëshirën e saj e ka dërguar atë në një shtëpi të pabanuar në Prishtinë.
Tutje thuhet se aty i dyshuari bashkë me katër persona të tjerë dyshohet se e kanë dhunuar dhe e kanë detyruar viktimën të përdorë drogë deri më datë 5 maj.
Me urdhër të prokurorit kujdestar, rasti është inicuar dhe është duke u hetuar.
“Prishtinë, 30.04.2021/05.05.2021. Ankuesja femër kosovare është paraqitur në stacion të policisë dhe ka raportuar se më datë 30.04.2021 e kishte takuar të dyshuarin, i cili pa dëshirën e saj e kishte dërguar atë në një shtëpi të pabanuar në Prishtinë dhe së bashku me katër persona të tjerë meshkuj dyshohet se e kishte dhunuar dhe kishte detyruar të konsumonte substanca narkotike deri më datë 05.05.2021. Me urdhër të prokurorit kujdestar është inicuar rasti dhe është duke u hetuar”, thuhet në raport. /Insajderi.com
