Profesori Universitar në Fakultetin Filozofik në Prishtinë, Ardian Gola, ka rrëfyer një rast që ka të bëjë me vazhdimin e një kontrate pune në këmbim të marrëdhënieve seksuale, shkruan Insajderi.
Gola ka shkruar në Facebook se një mike e tij i ka treguar sesi asaj si kushtëzim për vazhdim të kontratës, ka qenë kryerja e marrëdhënieve seksuale me personin që e ka punësuar.
“Njeriu i cili i kishte ndihmuar të punësohej, e i cili aksidentalisht është në pushtet, sepse në rrethana normale pozita meritore e tij nuk do të shkonte pertej çobanit, fillon e bëhet gjithnjë e me eksplicit në kushtëzimin seksual të vazhdimit të kontratës”, ka shkruar Gola.
Profesori unversitar ka shkruar se mikja e tij i ka thënë se tashmë disa femra të tjera, janë pajtuar me këtë fat dhe se ato ofrojnë favore seksuale për njerëzit e pushtetit, qoftë për mbijetesë apo sipas tij, për një jetë më luksoze.
“Me fjalë të tjera, pushtetarët, kuptohet jo të gjithë, janë të përfshirë në prostitucion modern. Për “bosat” e sektorit privat, mos të flasim”, shkruan më tutje Gola./Insajderi/