Partia Socialdemokrate, ka thyer orën policore duke zhvilluar aksion pas orës 22:00.
Përkundër kësaj, Policia e Kosovës nuk e pengoi këtë aktivitet.
Kryetari i kësaj partie, Dardan Molliqaj, tha se ai policë që i ndëshkon është “shërbëtor i pushtetit”, pasi gjatë fushatës zgjedhore partitë politike nuk kanë respektuar masat anti-COVID dhe për tubimet e tyre “është përkujdesur policia”.
Qeveria e Kosovës ka marrë vendim që nga ora 10 e natës të ketë ndalesë të lëvizjes. Propozues i këtij vendimi ishte ministri Shëndetësisë, Arben Vitia që PSD e paraqiit në grafite si “Dr hipokriti”.
Por, një qasje të tillë të Qeverisë Kurti, Dardan Molliqaj e konsideroi si “paradigmë e disiplinës” që krijon “narracion për një sistem autoritar”.
“Qeveria e sheh popullin si turma e mendon se turma duhet të kontrollet”, pohoi ai.
Megjithatë, Molliqaj tha se respektojnë masat anti-COVID, por jo edhe orën policore që sipas tij është “sabllon”.
Madje, kryetari PSD-së theksoi se Qeverisë Kurti nuk i intereson jeta e qytetarëve.
“Po t’i interesonte jeta e qytetarëve do të kishin vendosur masa para që Vjosa Osmanit të zgjedhet presidente”.
Policia e Kosovës nuk ndërhyri në këtë aksion përkundër që është e ndaluar të lëvizet pas orës 22:00. /Insajderi.com