Punëtorët teknikë dhe punëtorët e sigurimit nga e premtja, më 11 shtator, do të fillojnë me refuzimin e kryerjes së punëve nëpër qendrat spitalore, qendrat e mjekësisë familjare dhe ambulanta, në shenjë proteste për mosstimulimin e këtyre punëtorëve me nga 300 euro të premtuara nga Qeveria e drejtuar nga Albin Kurti, njofton Insajderi.
Këtë e ka bërë të ditur kryetari i Sindikatës së Pavarur të Sektorit Privat të Kosovës, Jusuf Azemi, i cili tha se Qeveria dhe Ministria e Shëndetësisë nuk kanë lëvizur në kërkesën e kësaj sindikate lidhur me stimulimin e punëtorëve teknikë dhe atyre të sigurimit me një pagë prej 300 eurove.
“Të gjithë punëtorët e sektorit privat që kryejnë punë qendra spitalore, qendrat e mjekësisë familjare dhe ambulanta nga e premtja për një orë nuk do të kryen qendrat spitalore, në qendrat mjekësisë familjare dhe ambulanta, nga e premtja, një orë nuk do të kryejnë shërbime sepse ne konsiderojmë që me vendimin e qeverisë, gjegjësisht ministrit të Shëndetësisë përpos që jemi diskriminuar si punëtorë, jemi diskriminuar edhe në aspekt njerëzor sepse në të njëjtën dhomë ku një pacient i shtrirë me Covid, ku ka qasje mjeku, punëtori i sigurimit dhe ka qasje edhe punëtori i teknik”, tha ai duke shtuar ai se Ministria e Shëndetësisë duhet të kërkojë falje për këtë diskriminim.
“Jemi të vendosur që nga fundi i kësaj jave do të fillojmë me veprime më të buta dhe do të shkojmë me ato më të larta. Ne jemi të interesuar që shëndetin e çdo pacienti ta ruajmë por në rend të parë, kemi ardhur në pozitë që, meqë shteti nuk po ruan shëndetit tonë, atëherë ne jemi të obliguar ta ruajmë shëndetin me aq sa mundemi e sa dimë“, tha ai.
Sipas tij, për këtë protestë është konsultuar me të gjitha qendrat e mjekësisë familjare nëpër komuna dhe kanë përkrahje të gjerë por kanë vendos një hapësirë tre ditore për vetëdijesimin e Qeverisë.
Protestat nisin në gjithë QKMF-të në Kosovë, nga ora 13:00 deri në orën 14:00. /Insajderi.com
