Anëtari i Kryesisë së AAK-së, Rasim Selmanaj, ka bërë të ditur se në takimin mes presidentit Thaçi dhe të nominuarit për kryeministër nga koalicioni PAN-i, Ramush Haradinaj, është diskutuar për mbajtjen e seancës konstitutive.
Ai ka treguar se është biseduar që seanca në fjalë të mbahet javën që vjen, sa më shpejt që është e mundur.
“Është diskutuar që sa më shpejt të mbahet seanca, javën që vjen”, ka deklaruar ai.
Me këtë rast, Selmanaj ka thënë se një gjë e tillë do të ndodhë më së largu të mërkurën.
“E hëna është e mundshme, por e hënë, e martë, e mërkurë, nuk besoj që do të shkojë më shumë”, ka shtuar ai.
Ndërkohë, ka thënë se PAN-i i ka votat për ta formuar Qeverinë, andaj votimi i Qeverisë, sipas tij, mund të ndodhë pikërisht ditën kur do të mbahet seanca konstituive, shkruan “Zeri.info”.
“I kemi votat e deputetëve për ta formuar Qeverinë. Po presim dhe jemi duke u bërë gati që formimi i Qeverisë të ndodhë në të njëjtën ditë”, është shprehur ai, me ç’rast ka thënë se PAN-i është duke punuar që të arrihet një koalicion më i gjerë, me LDK-në e me AKR-në.
