Qindra qytetarë janë mbledhur në pikën kufitare në Morinë në pritje të presidentit të Kosovës, Hashim Thaçi, i cili po kthehet pas intervisitmit katër ditorë nga Haga, njofton Insajderi.
Qytetarët po u bien daulleve e surleve, ndërsa kanë veshur bluza me logon e Ushtrisë Çlirimtare të Kosovës e po mbajnë flamuj në duar.
Në një video të publikuar nga Facebook, nga deputetja e Partisë Demokratike të Kosovës, Ganimete Musliu, shihen qytetarët e shumtë pranë pikës kufitare duke pritur presidentin e Kosovës.
Më herët gjatë ditës, edhe djali i presidentit Thaçi, Endriti, ka ftuar qytetarët që të marrin pjesë në pritjen e presidentit.
“Mirë se vjen, president! Të gjithë në pritje të heroit të luftës dhe paqes. Pika kufitare në Morinë. E premte, 17 korrik 2020, ora 19:30. Eja edhe ti! Merre flamurin me vete. Vendose maskën dhe mbaje distancën”, ka shkruar Endriti në një postim në “Instagram”.
Thaçit i është ngritur aktakuzë nga Gjykata Speciale për krime lufte.
Ai, bashkë me Kadri Veselin e PDK-së dhe nëntë persona të tjerë, ende të paidentifikuar, akuzohen për 100 vrasje./Insajderi.com
Videon mund ta shikoni KËTU