Kryeministri i Shqipërisë, Edi Rama, tha se shtetet që ende nuk kanë pranuar të bëhen pjesë e “Ballkanit të Hapur”, do t’i bashkohen herët ose vonë, përcjell Insajderi.com.
Në një konferencë për media me presidenten e Komisionit Evropian, Ursula von der Leyen, Rama deklaroi se “kush vjen më vonë, thjesht i humbet kohë vendit dhe popullit të vet”.
Edi Rama në konferencë për media.
Sipas tij, kjo nismë është një interes strategjik dhe se është zbatim i Procesit të Berlinit.
“Ballkani i Hapur është një interes strategjik dhe është mekanizmi që bën Procesin e Berlinit. Për çdo projekt të BE-së ndërtohet një entitet që quhet njësia e zbatimit të projektit. E pra, Ballkani i Hapur është njësia e zbatimit të projektit të Procesit të Berlinit”, shtoi ai.
Kurti kishte deklaruar se emri “Ballkan i Hapur” nënkupton hapje ndaj ndikimeve ruse dhe kineze.
Kurse, presidentja e Kosovës, Vjosa Osmani, e ka quajtur të rrezikshme iniciativën e “Ballkanit të Hapur”, duke thënë se e vonon integrimin evropian të rajonit, teksa shtoi se Procesi i Berlinit është zgjidhja e vetme dhe e duhur për avancimin e rajonit.
