Nenad Rashiq nga Partia Demokratike Progresive ka thënë se deklarata e Goran Rakiq, kryetarit të Listës Serbe, për atë se në zgjedhjet e 14 shkurtit do t’i fitojnë 10 ulëset në Kuvend të Kosovës, ka një target tjetër sa i përket numrit të përfaqësuesve, njofton Insajderi.
Rashiq në Info Magazine të Klan Kosovës ka deklaruar se Lista Serbe është duke bërë presion mbi serbët në Graçanicë që ta votojnë një iniciativë rome.
“Deklaratën e Rakiqit të dhënë në ditën kur e bëri publike listën e kandidatëve, po e citoj siç ishte ‘Ne besojmë se do t’i fitojmë të gjitha 10 mandatet për serbët në Kuvend, përveç kësaj do të përkujdesemi edhe për boshnjakët, romët, egjiptianët, ashkalinjtë dhe goranët’. Unë mendoj se këto fjalë mund të kenë një target tjetër sa i përket numrit të përfaqësuesve në parlament”.
Tutje Rashiq ka thënë se “në Graçanicë, është formuar një iniciativë e re politike e cila quhet Iniciativa Qytetare Rome. Ka shtatë ditë që një kompani lokale e quajtur “Ekologia” bën lobime dhe kërcënime tek serbët në këtë qytet, që ta votojnë këtë iniciativë. Unë e kam fjalën për punëtorët e kompanisë që janë kryesisht në teren”.
“Unë për 15 vjet jam duke u marrë me këto çështje, është e pazakontë që të ketë lobim ndaj serbëve që të votojnë romët. Mendoj se kjo kompani është nën ndikimin e Listës Serbe”, është shprehur ai./Insajderi.com
