“Qeveria e Republikës së Kosovës shpreh zhgënjimin e thellë ndaj disa deklaratave publike të zyrtarëve të lartë të Serbisë, të cilët hapur vazhdojnë të shfaqin mungesë të thellë respekti për viktimat e luftës së fundit në Kosovë, si dhe familjet e tyre, të cilat, qe dy e më shumë dekada, vazhdojnë t’i kërkojnë me dëshpërim të afërmit e tyre të rrëmbyer nga forcat serbe”.
Ky ka qenë reagimi i kryemnistrit të Kosovës, Avdullah Hoti, ndaj kërcenimeve indirekte që Ivica Daçiq bëri ndaj serbëve të cilët tregojnë për varret e shqiptarëve të vrarë nga Serbia dhe ndaj fyerjeve që ministri i mbrotjes së Serbisë, Aleksandër Vulin ka bërë ndaj shqiptarëve.
“Këto deklarata skandaloze, përveçqë fyejnë rëndë të gjitha viktimat e krimeve serbe, dëshmojnë para botës se Beogradi zyrtar, gjatë gjithë këtyre viteve, qëllimisht dhe vetëdijshëm i ka mbuluar gjurmët e krimit, duke e mbajtur fshehur vendndodhjen e varrezave masive, në të cilat kanë përfunduar mijëra civilë të pafajshëm”, ka thënë ndër tjerash Hoti.
Kreu i ekzekutivit ka kërkuar që ndaj këtyre deklarave të reagojë Bashkimi Evropian dhe Shtetet e Bashkuara të Amerikës.
“Qeveria e Republikës së Kosovës e kundërshton këtë mendësi politike dhe presim që këtë ta bëjë edhe bashkësia ndërkombëtare, veçmas Bashkimi Evropian dhe Shtetet e Bashkuara të Amerikës, si faktorë të pazëvendësueshëm të ndërtimit të paqes dhe të perspektivës euroatlantike të Ballkanit Perëndimor”, tha kryeministri.
Më tutje,Avdullah Hoti, theksoi se “Qeveria e Republikës së Kosovës është e vendosur të punojë me përkushtim për një të ardhme paqësore të rajonit dhe do të vazhdojë të bashkëpunojë fuqishëm me aleatët perëndimorë për integrimin sa më të shpejtë në familjen e madhe të vendeve të qytetëruara e demokratike euroatlantike, në të cilën nuk ka vend për urrejtje ndaj etnive të tjera”. /Insajderi.com
