Rrjeti i Grave të Kosovës, e ka uruar presidenten Vjosa Osmani për pozitën e re, njofton Insajderi.
Siç njofton ky rrjet në urimin e tij, zgjedhja e Osmanit nuk shënon datë të rëndësishme vetëm për institucionin e Presidencës, por ajo jep shpresë dhe forcë edhe për fuqizimin e mëtejshëm të grave në politikë dhe procese vendimmarrëse në shoqëri.
“Ardhja juaj në krye të një prej tri institucioneve më të rëndësishme bart në vete mesazhin e domosdoshëm drejt mundësisë reale të rritjes së pjesëmarrjes së grave në politikë”, thuhet në njoftimin e këtij rrjeti.
“Përvoja juaj afatgjate në politikë dhe mbështetja e vazhdueshme për të drejtat e grave në Kosovë do të shërbejë si inkurajim për të gjitha vajzat që duan të jenë pjesë e politikës. Po ashtu, ajo është frymëzim dhe për ne, si organizatë që përpiqet çdo ditë për barazi gjinore, duke mbajtur ‘Gratë në Politikë dhe Vendimmarrje’ si program kyç të këtij rrugëtimi”.
Përveç pozitës së shefit të shtetit, Rrjeti i Grave në urimin e tij ka kujtuar edhe praninë e barabartë të grave në pozitat tjera në politikë e sferën publike, duke përmendur edhe ulëset që kanë zënë gratë në Kuvend nga zgjedhjet e fundit parlamentare në Kosovë.
“Kujtojmë se zgjedhja juaj po vjen vetëm pak kohë pas zgjedhjeve parlamentare të 14 shkurtit 2021, zgjedhje të cilat shënuan numrin më të madh të grave të zgjedhura në Kuvend. E megjithëkëtë, të drejtat dhe prania e barabartë e grave, jo vetëm në politikë e sferën publike, ende mbeten një betejë që kërkon punë e angazhim deri në fitore”.
“Këtë fitore, mund ta arrijmë vetëm së bashku. Së bashku e me solidaritet”.
“Kësisoj, për një shoqëri më të barabartë, përveç urimit, RrGK njëherit shtrin dorën e bashkëpunimit dhe solidaritet me ju përgjatë gjithë mandatit presidencial”. /Insajderi.com
