Zëvendëskryeministri i Kosovës, Driton Selmanaj, thotë se delegacioni i Kosovës nuk do të hapë temën e Asociacionit në Bruksel, njofton Insajderi.
Sipas Selmanajt, “Kosova do të provojë që në momentin që nënshkruhet marrëveshja finale, të bëhet zotimi për përmbushjen e obligimeve ndërkombëtare dhe ligjore”.
Tutje Selmanaj theksoi se “Kosova nuk do të hyjë në materializimin e asnjë pjese të marrëveshjes përderisa nuk nënshkruhet marrëveshja finale”.
“Nuk do ta hapim çështjen e Asociacionit por do të provojmë që në momentin kur do ta nënshkruajmë marrëveshjen finale të zotohemi se do të kryejmë obligimet tona ndërkombëtare dhe obligimet tona ligjore që i kemi marrë në Kuvendin e Kosovës, gjithmonë duke respektuar aktgjykimin e Gjykatës Kushtetuese”, tha Selmanaj për RTV21. /Insajderi.com
