Kryetari i Gjykatës së Apelit, Hasan Shala, ka thënë se institucioni që ai drejton ka shtuar dukshëm efikasitetin në gjysmën e parë këtij viti.
Shala në një konferencë për media tha se përkundër sfidave dhe vështirësive, gjyqtarët e kësaj gjykate kanë arritur t’i kryejnë mbi 6 mijë lëndë, nga 19 mijë sa ka pasur në punë.
“Gjykata e Apelit për fat jo të mirë, e ka filluar punën në vitin 2018 më 12 e 576 lëndë të pa zgjidhura. Në gjashtë mujorin e parë të vitit 2018, kemi pranuar në punë 7 mijë e 12 lëndë. Në total i bije se gjatë kësaj periudhe kemi pasur në punë 19 mijë e 588 lëndë. Nga to, përkundër sfidave dhe vështirësive gjykata ka arritur t’i zgjidh 6 mijë e 410 lëndë. Ndërsa në punë vazhdojnë të mbesin edhe 13 mijë e 178 lëndë”, tha Shala.
Sipas tij, nëse këtë numër të lëndëve të zgjidhura, e krahasojmë me numrin e lëndëve të pranuara gjatë këtyre muajve, del se janë zgjidhur 91 % të lëndëve që kanë ardhur në gjykatë, apo 572 lëndë më shumë se në periudhën e njëjtë të vitit 2017.
Kryetari Shala, potencoi se në Gjykatën e Apelit, nuk ka asnjë lëndë që ka të bëjë me procesin e liberalizimit të vizave, ndërsa lëndët kundër korrupsionit po shqyrtohen me prioritet.
