“Është e vështirë për Shtetet e Bashkuara të Amerikës të kuptohet pse nuk është vendosur ende drejtësia për rasin e djegies së ambasadës gjatë trazirave të muajit shkurt të vitit 2008 në Beograd”.
Kështu është shprehur Ambasada e Amerikës në Beograd për Radio Evropën e Lirë, duke shtuar se është jetike të dihet se cilat autoritete mund të jenë të përfshira në këtë akt të paligjshëm me pasoja tragjike.
“Është e rëndësishme të theksojmë faktin se disa individë nuk kanë përmbushur detyrat e tyre ligjore. Kjo vlen edhe për policinë serbe që u tërhoqën nga pozicionet e tyre pranë ndërtesës së ambasadës pak para sulmit. Është gjithashtu jetike të zbulohet se cilat autoritete mund të jenë përfshirë në këtë akt të paligjshëm me pasoja kaq tragjike”, tha ambasada e SHBA-së.
Gjyqi ndaj pesë drejtuesve të policisë, para Gjykatës së Lartë në Beograd, të akuzuar për dështim në ofrimin e sigurisë për Ambasadën e SHBA-së, u anulua më 17 shtator, për shkak të detyrimeve zyrtare të gjyqtarit të përkohshëm, ndërsa do të vazhdojë të premten më 18 shtator.
Ata akuzohen për veprim serioz kundër sigurisë publike. Sidoqoftë, aktakuza nuk shqyrton përgjegjësinë e mundshme politike për trazirat që ndodhën pas shpalljes së pavarësisë së Kosovës.
Gjyqi i oficerëve të policisë është shoqëruar me disa shtyrje të seancave dhe ndryshime në aktakuzë. Gjyqi filloi pas seancave përgatitore në qershor të këtij viti.
“Tani që gjyqi për zjarrvënien në Ambasadën e SHBA-së është riaktivizuar, pas kaq shumë vitesh vonesash të pakuptueshme, Shtetet e Bashkuara theksojnë rëndësinë e sjelljes para drejtësisë të atyre, veprimet ose mosveprimet e të cilëve, kishin pasoja kaq të tmerrshme, përfshirë vdekjen tragjike të një shtetasi serb, si dhe dëmin e madh që zjarri i shkaktoi ambasadës sonë”, thuhet në deklaratë.
Rasti i djegies së ambasadës, së bashku me çështjen ende të pazgjidhur të vrasjes së vëllezërve Bytyqi, shtetasve amerikanë me origjinë shqiptare, konsiderohet si një pengesë serioze për përmirësimin dhe normalizimin e plotë të marrëdhënieve midis Serbisë dhe Shteteve të Bashkuara. /Insajderi.com
