Rexhep Selimi, shefi i Grupit Parlamentar të Lëvizjes Vetëvendosje, ka thënë se koalicioni qeverisës VV-LDK nuk do të mund të vazhdonte, pasi siç ka thënë ai, nuk kanë ekzistuar rrethana për vazhdimin e bashkëpunimit ndërmjet dy subjekteve.
Selimi ka folur edhe për shkarkimin e ish-ministrit të Punëve të Brendshme, Agim Veliu.
Ai ka thënë se Veliu ka qenë i ndikuar nga jashtë për t’u deklaruar pro shpalljes së gjendjes së jashtëzakonshme.
“Pastaj në mesnatë doli edhe ministri i Brendshëm dhe tha që është e nevojshme të shpallet gjendja e jashtëzakonshme. Ai shpërndau edhe panik duke thënë se gjendja po del jashtë kontrollit dhe se të infektuarit po shtohen nga ora në orë. Kjo i bie që ai i doli në përkrahje politike Thaçit dhe ishte në kundërshtim me Qeverinë”, tha ai në RTV Dukagjini.
Shefi i GP të Lëvizjes Vetëvendosje tha se “nuk ka pasur më rrethana” për vazhdimin e koalicionit qeverisës VV-LDK.
“Nëse krejt Qeveria ka qenë e varur nga ministri i Brendshëm Veliu, s’ka pasur pse të vazhdoj bashkëpunimi. S’do duhej të varet nga një individ”, ka thënë ai.
