E, edhe ato paga që marrin, shërbyeseve civil, ka rrezik t`u përgjysmohen.
Kjo pasi Ministria e Financave po e shqyrton mundësinë që me përgjysmimin e pagave të këtij sektori ta ndihmojë sektorin privat në kohë pandemie me Covid-19
Kundër, këtij paralajmërimi i kanë dalë kryesindikalistët.
Kryetari i Sindikatës së Shërbyesve Civil të Republikës së Kosovës, Mursel Zymberi, tha se një vendim i tillë do të ishte anti-Kushtetues.
“E drejta e pagës është çështje Kushtetuese. Këtu nuk ka askush të drejtë të ndërhyjë në pagë pa pëlqim apo leje dhe pa ndonjë vendim të Kuvendit të Kosovës. Në asnjë mënyrë dhe në asnjë moment nuk e pranojmë një kërkesë të tillë ose një vendim që mund ta marrë Qeveria e që nuk do të ishte të na provokojë sepse ashtu kështu ai vendim do të quhej anti-kushtetues”, u shpreh ai për Front Online.
Në Sindikatë thonë se do ta kuptonin Qeverinë nëse nuk do të ndante mjete shtesë për ta në këtë kohë pandemie, por asesi një vendim të saj sa i përket uljes së pagave.
E për ata që ia mësyjnë një hapi të këtillë, Zymberi ka një paralajmërim.
“Sindikata ka mjetet e veta për reagim. Eventualisht në rast se Qeveria lëshohet në aventura të tilla, po them merr vendim për përgjysmim të pagave apo çfarëdo prekje te pagave në Shërbim Civil, ju siguroj se të gjitha masat e nevojshme sindikale do të hyjnë në fuqi. Do të kemi bllokim të administratës shtetërore në tërësi”, theksoi ai për Front Online.
Paga mesatare e shërbyeseve civilë në Kosovë është 340 euro në muaj.
Me ligjin e ri të Pagave, i cili është pezulluar deri në qershor, disa nga shërbyesit civilë pagat mund të marrin me një rritje për 40 euro më shumë në muaj.
Por, me këtë rritje të pakënaqura janë sindikatat e Shërbyesve Civilë të cilat kanë kërkuar ngritje të koeficientit.
