Ramë Likaj: Kemi tre skenarë, të cilët janë në funksion në bazë të gjendjes me pandeminë, i fundit është ai për mësimin në distancë, por do të punohet që mësimi të mbahet në shkolla me masa mbrojtëse dhe kujdes maksimal.
Ministri i Arsimit dhe Shkencës, Ramë Likaj, ka thënë se shumë shpejt do të merret vesh data se kur do të fillojë mësimi nëpër shkollat e Kosovës dhe saktësisht në çfarë forme, njofton Insajderi.
Këto komente Likaj i ka bërë derisa ka realizuar një vizitë në komunën e Gjilanit ku ka zhvilluar edhe një takim me kryetarin e këtij qyteti, Lutfi Haziri.
“Presim së shpejti publikimin e vendimit dhe datën kur do të fillojë mësimi. Në këto kushte pandemie, jemi shumë të kënaqur me përgatitjet për fillimin e mësimit. Gjithashtu, kemi biseduar edhe për angazhimin e mësimdhënësve rezervë dhe studentëve të Fakultetit të Edukimit në procesin mësimor”, deklaroi ministri.
“Kemi tre skenarë, të cilët janë në funksion në bazë të gjendjes me pandeminë, i fundit është ai për mësimin në distancë, por do të punohet që mësimi të mbahet në shkolla me masa mbrojtëse dhe kujdes maksimal”, ka thënë Likaj./Insajderi.com
