“Qeveria e Kosovës duhet ta marrë seriozisht iniciativën për ta paditur Serbinë për gjenocid gjatë luftës së fundit në Kosovë, por nëse nëse nuk mund ta bëjë një gjë të tillë, atëherë këtë nismë duhet ta marrë Shqipëria me një mirëkuptim dhe bashkërendim politik e institucional”.
Kështu ka bërë të ditur Profesori universitar, Mazllum Baraliu, i cili tha se Kosova e ka bazën ligjore në të drejtën ndërkombëtare për ta bërë një kërkesë të tillë.
“Serbia jo vetëm që nuk ka marrë mësim nga gjenocidi që ka bërë në Kosovë por ajo ka vazhduar të jetë më agresive dhe më mospërfillëse ndaj Kosovës krimeve që ka bërë këtu, pasojat që ka shkaktuar dhe qëndrimit institucional të Kosovës dhe shtetit të saj prandaj gjithsesi që është iniciativë e duhur ndonëse e vonuar. Kosova mund ta padisë sepse është shtet ndërkombëtarisht i njohur. Është e vërtetë që Kosova nuk është anëtare e OKB-së, por megjithatë është shtet i pavarur dhe sovran. Do të duhej që aty ku adresohet kjo kërkesë të pranohet kërkesa e Kosovës dhe ka bazë që të pranohet sepse gjenocidi ka ndodhur”, tha ai në një intervistë për EO.
“Nëse kjo nuk ndodh duhet të shtet i tretë në këtë rast Shqipëria që ka përgjegjësi në Kushtetutën e saj që të kujdeset për shqiptarët jashtë territorit të saj dhe do duhej ta bënte dhe besoj që pa asnjë dyshim. Shqipëria mund të iniciojë një çështje të tillë natyrisht me një mirëkuptim dhe bashkëveprim politik dhe institucional me Kosovën”, shtoi Baraliu.
Kryeministri i vendit, Albin Kurti, pjesë të rëndësishme të planit të tij qeverisës e ka bërë edhe padinë për gjenocid ndaj Serbisë, duke thënë se do të përdorë çdo mekanizëm ligjor që kjo të ndodh sa më shpejt./Insajderi.com
