Seanca gjyqësore në rastin e njohur si “Toka” ku i akuzuar është ish-deputeti i PDK-së Azem Syla dhe të tjerët është shtyrë, kjo pasi sipas kryetarit të trupit gjykues Beqir Kalludra nuk janë plotësuar kushtet për mbajtjen e saj. Seanca është shtyrë për datën 12 korrik.
Gjyqtari Beqir Kalludra, me fillimin e seancës konstatoi prezencën dhe mos mos-prezencën e të akuzuarve. Prezent në sallë ishte edhe prokurori i Prokurorisë Speciale Abdulrrahim Islami.
“Me qenë se nuk janë plotësuar kushtet për mbajtjen e seancës, trupi gjykues merr vendim se shqyrtimi i sotëm i kësaj seance të shtyhet. Seanca tjetër do të mbahet me 12 korrik në orën 9:00”, tha kryetari i trupit gjykues Beqir Kalludra.
Që në fillim, avokati i të akuzuarit Azem Syla, Besnik Berisha th ase klienti i tij është rrugës duke ardhur në Gjykatë.
“Azem Syla është rrugës tu ardh se ka shku policia me e marrë”, tha avokati Berisha, njofton Kallxo.com
Ai akuzohej së bashku me 21 persona tjerë për krim të organizuar në lidhje me tjetërsimin e tokave me pronësi shoqërore në Veternik dhe Llapnasellë, afër Prishtinës.
Gazeta Online Insajderi kishte sjellë një seri hulumtimesh lidhur me rastin “Toka” gjatë dy viteve të fundit. Kishte siguruar aktakuzën e Prokurorisë Speciale të Republikës së Kosovës ndaj Sylës dhe grupit të dyshuar të tij.
