Sindikata e Policisë së Kosovës ka dënuar sulmet e qytetarëve ndaj zyrtarëve policorë në detyrë, si dhe ka bërë thirrje të bashkëpunojnë me institucionet, njofton Insajderi.
Kështu kanë bërë të ditur nga kjo sindikatë përmes një komunikatë për medie.
“SPK-ja dënon këto veprime, duke ua rikujtuar të gjithëve se zyrtarët policorë janë të përgatitur profesionalisht dhe janë në gjendje gatishmërie ta mbrojnë vetveten e tyre dhe çdo qytetar të Republikës së Kosovës, duke respektuar vendimet e Qeverisë për respektimin e masave, ku në këtë kohë të vështirë Policia e Kosovës është e obliguar të dalë në terren dhe të ndërmarrë masa konform ligjeve pozitive të vendit në parandalimin dhe luftimin e pandemisë Covid-19”, thuhet në njoftim.
Po ashtu, përmes kësaj komunikate, Sindikata e Policisë së Kosovës ka rikujtuar se policët janë të angazhuar me orar 12-orësh dhe kjo paraqet barrë shtesë për shëndetin fizik të zyrtarëve policorë, përpos rrezikut nga pandemia, që duhet t’i ekspozohen duke bërë kontrolle të kohëpaskohshme të qytetarëve dhe të automjeteve.
“U bëjmë thirrje të gjithë qytetarëve të Republikës së Kosovës, jemi duke kaluar nëpër një periudhë të vështirë kohore të një pandemie, sot më shumë se kurrë na duhet bashkëpunimi me qytetarët e Republikës sonë dhe jo sulmet fizike ndaj policëve, të cilët po kryejnë detyrën e tyre zyrtare, në mbrojtje të rendit dhe ligjit.
Gjithashtu, bëhet thirrje organeve ligjvënëse dhe kompetente që dënimet e tilla të jenë më rigoroze dhe të më të ashpra ndaj personave të pandërgjegjshëm, meqenëse numri i sulmeve çdo ditë e më shumë po shtohet në forma të ndryshme nënçmuese ndaj zyrtarëve policorë që i përkasin institucionit më të besuar në vend. /Insajderi.com
