Në mesin e të arrestuarve nga aksioni i djeshëm i Policisë për dallaveret me patentë shofer është Haki Jashari.
Haki Jashari, nga Mazgiti është Drejtor i Qendrës Kryesore të Mjekësisë Familjare (QKMF) në Obiliq. Insajderi merr vesh se Jashari dyshohet se ka lëshuar certifikata për kandidatët potencial për patentë shofer.
Burimet e Insajderit kanë bërë të ditur se Jashari është djali axhës së Hilmi Jashari, i cili udhëheq institucionin e Avokatit të Popullit që nga vitit 2015.
Policia e Kosovës në koordinim me Prokurorinë e Shtetit kanë zhvilluar një aksion nëpër disa qendra ku mbahen provimet për patentë shofer.
Zëdhënësi i policisë Daut Hoxha, e ka konfirmuar për Insajderin këtë aksion.
Raportohet se deri tash janë arrestuar rreth 23 persona, duke përfshirë edhe zyrtarë të Ministrisë së Infrastrukturës.
Vetë ministri i Infrastrukturës, Pal Lekaj ka thënë se nuk është në dijeni për aksionin e Policisë së Kosovës.
“Ne nuk kemi informacione ende për atë se çfarë ka ndodhur sot. Megjithatë unë e kam ripërsëritur disa herë se Ministria është e hapur për organet e drejtësisë, por pres që ajo të shkoj deri në fund”, ka thënë Lekaj.
